Dua e qunoot jisy “Witr ki Dua” bhi kaha jata hai. Aik aesi dua hai jo witr ki teesri rakat mein parhi jati hai aur yeh wajibat e namaz mein se hai. Es dua ko ada karne se pehlay jo takbir qunoot kahi jati hai woh bhi wajib hai. Es tehreer me hum duae qunoot ke sath sath eska tarjuma aur eskay mutaliq kuch masail bhi bayan karen ge.
Hazrat Abdullah bin Masood رضی اللہ عنہ ne farmaya : Piyare Aaqa ﷺ ne witr ki teen rakat parheen jis mein (Aakhri) ruku se pehly dua e qunoot parhi. [1]Sunan Al Kubra Bayhaqi, Hadees : 4866
Dua e Qunoot aur eska Hukm
Witr ki teesri rakat mein qirat se farigh ho kar ruku se pehlay kaanon tak haath utha kar Allahu Akbar kahy. Jaisay takbeer e tehreema mein karte hain phir haath bandh le aur dua e qunoot parhay. Duae qunoot ka parhna wajib hai aur dua qunoot kisi khaas dua ka naam nahi aur nah hi witr mein kisi khaas dua ka parhna zaroori hai. Balkay har woh dua jo Sarkar ﷺ se saabit hai parh li jaye jab bhi harj nahi. Albata! Sab mein ziyada mashhoor dua yeh hai aur aam log isi dua ko dua e qunoot bhi kehte hain:
Dua e Qunoot Tarjuma
Tarjuma : “Ae Allah! Hum tujh se madad chahtay hain aur tujh se bakhshish mangte hain aur Tujh par imaan laatay hain aur tujh par bhrosa rakhtay hain aur teri bohat achi tareef karte hain aur tera shukar karte hain aur teri na shukri nahi karte aur allag karte hain aur chortay hain os shakhs ko jo teri nafarmani kare, Ae Allah! Hum teri hi ibadat karte hain aur tairay hi liye namaz parhte aur sajda karte hain aur teri hi taraf dorrtay aur khidmat ke liye haazir hotay hain aur teri rehmat k umeed waar hain aur tairay azaab se dartay hain bay shak tera azaab kafiroon ko milnay wala hai.”

Agar kisi ko dua e qunoot nah aati ho to woh yeh parh le:
Ae Allah! Ae hamaray maalik! Tu hamein dunya mein bhalai aur aakhirat mein bhi bhalai ataa farma aur hamein dozakh ke azaab se bacha. [2]Alamgiri
Ya yeh parheen :
Yani Ae Allah! Meri mughfirat farma day.
Jab dua qunoot parhay to aahista parhay. Bhallay hi imam ho ya akela ho ya imam ke peechay namaz ada kar raha ho, ada namaz ho ya qaza namaz, Ramadan mein ho ya aur dinon mein. [3]Radd al-Muhtar
Jamaat ke sath witr ada karne ka ahem masla
Ramadan ul Mubarak mein witr jamaat se parh rahay hon aur imam Muqtadi ke mukammal qunoot parhnay se pehlay hi ruku mein chala jaye to Muqtadi ko chahiye ke woh bhi imam k sath foran ruku mein chala jaye aur baqi dua e qunoot nah parhay.
Agar imam ne qunoot nahi parhi aur bhool kar ruku kar diya aur Muqtadi ne abhi kuch nah parha, to Muqtadi ko agar ruku fout honay ka dar ho tab to ruku kary, warna qunoot parh kar ruku mein jaye. Es mauqa par os khaas dua ki haajat nahi jo dua qunoot ke naam se mashhoor hai, Balkay koi dua jisay qunoot keh saken parh le. [4]Alamgiri, Radd al-Muhtar
Dua Qunoot parhna bhool gaya!
Jo shakhs dua e qunoot parhna bhool jaye aur ruku mein chala jaye to os ke liye jaaiz nahi ke woh dua qunoot parhnay ke liye ruku se paltay. Balkay usay hukum yeh hai ke woh namaz poori kary aur aakhir mein sajda sahw kar le. [5]Alamgeeri Esi terhan agar takbir qunoot bhool gaya to tab bhi sajda sahw kary ga, Takbir e qunoot se morad woh takbir hai jo qirat ke baad dua qunoot parhnay ke liye kahi jati hai. [6]Alamgiri
Bhool kar pehli ya doosri rakat mein dua e qunoot parh li to teesri mein phir parhay. [7]Ghaniyah, Huliya, Bhar
Qunoot e Nazla
Witr ke siwa kisi aur namaz mein dua e qunoot nah parhay haan Albata agar musalmanoon par koi bara haadsa paish aaye to Fajar ki doosri rakat mein ruku se pehlay dua qunoot parh satke hain isko qunoot e nazla kehty hain. [8]Radd al-Muhtar, Page: 541
Aakhir mein, jis par kasrat se qaza namazain hon woh aasani ke liye witr ki teesri rakat mein dua qunoot ki jagah sirf 1 ya 2 baar “رَبِّ اغْفِرْ لِیْ” kahy. [9]Namaz kay Ahkam, Page: 338
Hawala Jaat