Eid ul Azha aur Hazrat Ibrahim ka qurbani ka waqia

Hum har saal Eid ul Azha kay moqa par josh o kharosh say qurbani karte hen. Ye eid 3 din par mushtamil hoti hen. Aur apne saath bahut c baharen laati hai. Islam mein mojoud tamam ahkaam takreeban kisi na kisi waqia say munsalik hotay hen. Qurbani karne kay pechy bhi ek aesa waqia mojoud hai jiska ka khulasa es tehreer mein aap mulahiza farmaien gay. Ye waqia ek khuwab say shuru hota hai.

Teenon raat mein ek tarha ka khuwab

Hazrat-e-Ibraheem nay zul-hajj ki aathvin raat ek khuwab daykha. Jis mein koi kehnay wala keh raha hay: “Bay shak Allah tumhay apne betay ko zibah karnay ka hukum dayta hay.” Ap subha say sham tak is baaray mein ghor farmatay rahay kay ye khuwab Allah ki taraf say hay ya shaitan ki janib say? Isi liye 8 zul-hajj ka naam یَوْمُ التَّرْوِیَہ [1]Yani soch bichaar ka din rakha gaya hay.

Navin raat phir wo he khuwab daykha aur subha yaqeen kar liya kay ye hukum Allah ki taraf say hay. Esi liye 9 zul-hajj ko یوم عرفہ [2]Yani pehchannay ka din kaha jata hay.

Dasveen raat phir wo he khuwab daykhnay kay baad Ap nay subha us khuwab per amal karnay[3]Yani betay ki qurbani ka pakka iraada farma liya. Jis ki waja say 10 zul-hajj ko یَوْمُ النَّحْر yani “Zibah ka din” kaha jata hay. [4]Tafseer Kabeer, vol. 9, pp. 346

“Betay ki qurbani” say roknay ki shaitan ki na-kaam koshish

Allah kay hukum per amal kartay huway betay ki qurbani kay liye Hazrat-e-Ibraheem jab apne piyaray betay Hazrat-e-Ismaeel ko jin ki umar us waqt 7 saal [5]Ya 13 saal ya is say thori zaayid thi lay kar chalay. Shaitan in ki jaan pehchaan walay ek shakhs ki soorat mein zahir hua aur pochnay laga: Ay Ibraheem! Kahan ka iraada hay? Ap nay jawab diya: ek kam say ja raha hun. Us nay pocha: Kya aap Ismaeel ko zibah karnay ja rahay hain?

Hazrat-e-Ibraheem nay farmaya: Kya tum nay kisi baap ko daykha hay kay wo apne betay ko zibah karay? shaitan bola: Jee han, apko daykh raha hun kay ap isi kam kay liye chalay hain! Ap samajhtay hain kay Allah nay apko is baat ka hukum diya hay. Hazrat-e-Ibraheem nay irshad farmaya: Agar Allah nay mujhay is baat ka hukum diya hay tu phir main is ki farman-bardaari karunga.

Hazrat-e-Hajra ka shaitan ko jawab

Yahan say mayoos ho kar shaitan Hazrat-e-Ismaeel  ki ammi jaan Hazrat-e-Hajra kay pas aaya aur in say poocha: Ibraheem ap kay betay ko kahan lay kar gaye hain? Hazrat-e-Hajra nay jawab diya: Wo apne ek kam say gaye hain. Shaitan nay kaha: Wo unhay zibah karnay kay liye lay gaye hain. Hazrat-e-Hajra nay farmaya: Kya tum nay kabhi kisi baap ko daykha hay kay wo apne betay ko zibah karay? Shaitan nay kaha: wo ye samajhtay hain kay Allah nay unhay is baat ka hukum diya hay.

Ye sun kar Hazrat-e-Hajra nay irshad farmaya: “Agar aysa hay tu unho nay Allah ki itaat [6]Yani farman bardaari kar kay bohat acha kia.” Is kay baad shaitan Hazrat-e-Ismaeel kay pas aaya aur unhay bhi isi tarha say behkaanay ki koshish ki lekin unho nay bhi ye he jawab diya kay agar meray abbu jaan Allah kay hukum per mujhay zibah karnay lay ja rahay hain tu bohat acha kar rahay hain.

Shaitan ko kankariyan maarin

Jab shaitan bap betay, ko behkaanay mein na-kaam hua aur “Jamray” kay pas aya tu Hazrat-e-Ibraheem nay usay 7 “kankariyan” maarin, kankariyan maarnay per shaitan ap kay rastay say hat gaya. Yahan say na-kaam ho kar shaitan “dosray jamray” per gaya, farishtay nay dubara Hazrat-e-Ibraheem say kaha: “Isay maariye” Ap nay usay 7 kankariyan maarin tu us nay rasta chorr diya.

Ab shaitan “teesray jamray” kay pas pohncha. Hazrat-e-Ibraheem nay farishtay kay kehnay per ek baar phir 7 kankariyan maarin tu shaitan nay rasta chor diya. Shaitan ko 3 muqamaat per kankariyan maarnay ki yad baki rakhi gayi hay aur aj bhi haji in teenon jagahon per kankariyan maartay hain.

Beta qurbani kay liye tayyar

Hazrat-e-Ibraheem jab Hazrat-e-Ismaeel ko lay kar Kooh-e-Sabeer per pohnchay tu unhay ALLAH kay hukum ki khabar di, jis ka zikar Quran-e-Kareem mein in alfaaz mein hay:

یٰبُنَیَّ اِنِّیْۤ اَرٰى فِی الْمَنَامِ اَنِّیْۤ اَذْبَحُكَ فَانْظُرْ مَا ذَا تَرٰىؕ-

Tarjumat-ul-kanz-ul-Emaan: Ay meray betay main nay khuwab daykha main tujhay zibah karta hun ab tu daykh teri kiya raaye hay?

Farma’n bardaar betay nay ye sun kar jawab diya: ٰ

یٰۤاَبَتِ افْعَلْ مَا تُؤْمَرُ٘-سَتَجِدُنِیْۤ اِنْ شَآءَ اللّٰهُ مِنَ الصّٰبِرِیْنَ (۱۰۲)

Tarjuma Kanz ul Iman: Ay meray bap! Kijiye jis baat ka apko hukum hota hay, khuda nay chaha tu qareeb hay kay ap mujhay sabir[7]Yani sabar karnay wala paaye’n gey. [8]Paara 23, Surah As-saffaat: Ayat 102

Ye Faizan-e-Nazar tha ya kay maktab ki karamat
Seekhaye kis nay Ismaeel ko adab-e- farzandi

Mujhay rassiyon say mazboot baandh dijiye

Hazrat-e-Ismaeel nay apne walid-e-mohtaram say mazeed arz ki: Abbu jaan! Zibah karnay say pehlay mujhay rassiyon say mazboot baandh dijiye taa-kay main hil na sakun kiyun kay mujhay dar hay kay kahen meray sawab mein kami na hojaye aur meray khoon kay chheenton say apne kapray bacha kar rakhiye taa-kay unhay daykh kar meri ammi jaan ghamgeen na hon.

Chhuri khoob tayz kar lijiye kay meray galay per achi tarha chal jaye [9]Yani gala foran cut jaye kiyun kay mout bohat sakht hoti hay, ap mujhay zibah karnay kay liye payshani kay bal litaaiye [10]Yani chehra zameen ki taraf ho taa-kay apki nazar meray chehray per na parhay aur jab ap meri ammi jaan kay pas jayen tu unhay mera salam pohncha dijiye aur agar ap munasib samjhayn tu meri kameez unhay day dijiye, is say unko tasalli hogi aur sabar aajayega.

Hazrat-e- Ibraheem     nay irshad farmaya: Ay meray betay ! Tum Allah kay hukum per amal karnay mein meray kaise umda madadgar saabit ho rahay ho! Phir jis tarha Hazrat-e-Ismaeel nay kaha tha unko usi tarha baandh diya, apni chhuri tayz ki, Hazrat-e-Ismaeel ko payshani kay bal lita diya, un kay chehray say nazar hata li aur un kay galay pay chhuri chala di, lekin chhuri nay apna kam na kiya yani gala na kata. Us waqt Hazrat-e-Ibraheem per wahi nazil hui:

Tarjuma Kanz ul Iman: “Aur hum nay osay nida farmayi kay Ay Ibraheem bay-shak tu nay khuwab such kar dikhaya, hum aysa he silaa daytay hain naykon ko, bay-shak ye roshan jaanch thi aur hum nay ek barra zabeeha is kay fidiyay mein day kar osay bacha liya.”[11]Tafseer Khaazin, vol. 4, pp. 22

Jannat ka mayndhaa

Hazrat-e-Ibraheem nay jab Hazrat-e-Ismaeel ko zibah karnay kay liye zameen per lita diya tu Allah kay hukum say Hazrat-e-Jibrael ba-taur- e-fidiya jannat say ek mayndha [12]Yani dumba liye tashreef laaye aur door say unchi awaz mein farmaya: اَللّٰہُ اَکْبَر  اَللّٰہ ُاَکْبَر، jab Hazrat-e-Ibraheem nay ye awaz suni tu apna sar asmaan ki taraf uthaya aur jaan gaye kay Allah ki taraf say anay wali azmaayish ka waqt guzar chuka hay aur betay ki jaga fidyay mein mayndha bhayja gaya hai lihaza khush ho ۡkar farmaya:  لَآ اِلٰہَ اِلاَّ اللّٰہُ  وَ اللّٰہُ اَکْبَر،! Jab Hazrat-e-Ismail nay ye suna tu farmaya: ۡ اَللّٰہُ اَکْبَر وَ لِلّٰہِ الْحَمد، is kay baad say in teenon pak hazraat kay in mubarak alfaaz ki adayegi ki ye sunnat qayamat tak kay liye jari-o-saari hogayi. [13]Binayah Sharah Hidayah, vol. 3, pp. 387

Jannati mayndhay kay gosht ka kia hua??

Hazrat-e-Ibraheem   nay Hazrat-e-Ismail kay fidyay mein jo mayndha [14]Yani dumba zibah farmaya tha, os kay baaray mein aksar mufassireen ka kehna ye hay kay wo mayndha[15]Yani dumba jannat say aya tha aur ye wo he mayndha tha jis ko Hazrat-e-Adam kay betay Hazrat-e-Habeel nay qurbani mein paysh kia tha. Us mayndhay ka gosht pakaya nahin gaya balkay usay darindon [16]Yani phhaar kar kha janay walay janwaron aur parindon nay khaliya.

Jannati Mayndhay kay seeng

Hazrat-e-Sufiyan bin ‘Uyanah farmatay hain: Os mayndhay [17]Yani dumbay kay seeng arsa daraz tak Kaba shareef mein rakhay rahay yahan tak kay jab kaba shareef mein aag lagi tu wo seeng bhi jal gaye. [18]Musnad Imam Ahmad Bin Hanbal, vol. 5, pp. 589, Hadees 16637 Kaba shareef mein aag lagne ka waqia hum ne apni ek aur tehreer mein bayan kar diya hai.

Kya har koi khuwab daykh kar apna beta zibah kar sakta hay?

Yad rahay! Agar koi shakhs khuwab ya ghaybi awaz ki buniyaad per apne ya dosray kay bachay ya kisi insan ko zibah karay ga to sakht gunahgar aur azaab-e-naar ka haq-daar qaraar paayega. Hazrat-e-Ibraheem jo khuwab ki bina per apne betay ki qurbani kay liye tayyar hogaye ye haq hay. Kiyun kay Ap Nabi hayn aur Nabi ka khuwab wahi-e-elaahi hota hay.

In hazraat ka imtehan tha. Hazrat-e-Jibra’el jannati dumba lay aye aur Allah Pak kay hukum say Hazrat-e-Ibraheem nay apne piyaray betay kay bajaye us jannati dumbay ko zibah farma diya. Hazrat-e-Ibraheem aur Hazrat-e-Ismaeel ki is anokhi qurbani ki yad ta-qiyamat qayim rahay gi. Aur musalman har saal Baqra eid mein makhsoos janwaron ki qurbaniyan paish kartay rahen gey.

Main umeed karta hon aapko hamari ye tehreer pasad aai ho gi. Nechy comment box mein apni raaye ka zaroor izhar karen. Ta keh hum aapki talab jan saken aur apni service ko mazeed behtar bana saken. Shukria

Agar Aapko hamarai tehreer achi lagi to esy zarur apne chahne walon k sath share karen...
Share on Facebook
Facebook
Tweet about this on Twitter
Twitter
Share on LinkedIn
Linkedin
Share on Reddit
Reddit
Share on Tumblr
Tumblr
Digg this
Digg
Buffer this page
Buffer
Share on Yummly
Yummly
Email this to someone
email

Hawala Jaat   [ + ]

Ahsan Iqbal

About Ahsan Iqbal

Main ek blogger hon aur es website pe content share karta hon. Meri puri koshish hoti hai keh main aapko aesa content faraham karun jo parhne aur samajhne mein aasan ho. Es k elawa wo bilkul authentic ho. Es lye aap mery har article mein references zarur dekhen gay.

Leave a Reply

Please use your real name instead of you company name or keyword spam.