Muashray ka chain, sukoon, aman, mohabbat o pyar aur muashray ki taamer o taraqqi, Falah o behbood muashray mein rehne walay afraad par munhasir hai. aur har har fard par kuch zimmay dariyan hain agar woh un zimmay dariyon ko sahih tareeqay se ada kary ga to muashra en Awsaf se mutsif ho ga. Un zimmay dariyon ko poora karne ke liye hamein haqooq ul ibad ka ilm hona zaroori hai.
Definition
Haqooq “Haq” ki jama hai, jis ka maienay hai “Zaroori Hissa” aur haqooq ul ibad ka matlab hai musalmanoon ke woh tamam kaam aur mamlaat jin ka ihtimaam karna aik musalman ke liye zaroori hai.
Bandon ke haqooq mein bunyadi baat yeh hai ke doosron ko takleef se bachana aur sahoolat o raahat pahunchana. Es ke tehat yeh baatein ayengii ke apni zabaan aur haath se kisi ko takleef nah pahunchana, bad kalami aur badgumaani se bachna, kisi ka aib nah bayan karna, kisi par ilzaam nah lagana, sakht kalami se bachna, narmi o pyar o mohabbat se guftagu karna waghera.
Jo apne liye pasand ho wohi doosron ke liye pasand karna, Un ke liye khair ka baes ban-na, ustaad ka adab karna, shagirdon par meharbani karna, barron ki izzat karna, choton par shafqat karna, aulaad ki achi tarbiyat karna aur es ke ilawa deegar kayi haqooq hain.
Haqooq ul ibad ki Ahmiyat
Haqooq ul ibad ki ahmiyat ka andaza aap is baat se laga satke hain ke haqooq ul ibad ada nah karne se duniya mein muashray ka aman o sukoon barbaad ho jata hai. Poora muashra tabah ho jata hai jis terhan is waqt ke halaat aap ke samnay hain. Keh chori, daketi, zulm o sitam, najaaiz qabza, maar pait, larai jhagray waghera yeh saari cheezen sirf aik dosray ka haq ada nah karne ki wajah se ho rahi hain. Aik haq maarta hai to dosra badla laita hai. En ko dekh kar dosray bhi shuru ho jatay hain.
Agar saaray log aik dosray ka haq ada karte to nah police ki haajat rehti, nah court ki. Har bande ka haq osko esi duniya mein hi ada karna akhirat mein ada karne ki nisbat bohat aasaan hai. Kyunkay agar kisi ki haq talfi ki aur haq maaf kurwaye baghair is duniya se chalay gaye to kisi ko takleef dainay, maarny, zulm karne, paisay dabanay, gaali bakney, ghornay, jhirakhnay, ulajhney ya kisi bhi qisam ki haq talfi ki soorat mein saari zindagi ki nakiyon se haath dhona par satka hai. Mazeed yeh ke sahib e haq ke gunah bhi galy par sakte hain.
Qurani Aayat
Aur rishta daaron ko un ka haq do aur miskeen aur musafir ko (bhi do) [1]Bani Israel, 26
Tarjuma : Aur maan baap se acha sulooq karo aur rishta daaron aur yatimon aur mohtajon aur qareeb ke parosi aur daur ke parosi aur paas bethnay walay saathi aur musafir aur apne ghulam londion (ke sath acha sulooq karo) [2]An-Nisa, 36
Haqooq ul ibad par Ahadees
Aik dafaa Rasool ALLAH ﷺ ne irshad farmaya ke jisay pasand ho keh oske rizaq mein kushadgi ki jaye aur oski Umar daraaz ki jaye to usay chahiye ke woh sila rehmi kary. [3]Bukhari, 5985
Huzoor Akram ﷺ ne aik aur maqam par irshad farmaya ke musalman ki sab cheezen oska maal, oski aabroo aur oska khoon dosray musalman par haraam hain, aur aadmi ke bura honay ke liye itna hi kaafi hai ke woh apne musalman bhai ko haqeer samjhay. [4]Abbu-dawood, 4882
Nabi e Kareem ﷺ ne farmaya main aur yateem ki parwarish karne wala jannat mein is terhan hon gay aur aap ne shahadat aur darmiyani unglion ke ishara se (Qurb ko) bataya. [5]Bukhari, 6005
Hazrat Saeed bin Zaid se riwayat hai ke Rasool Allah ﷺ farmaya keh jis ne kisi ki zameen zulman cheeni usay qayamat ke din 7 zamiinon ka taoq pehnaya jaye ga. [6]Bukhari, 2452
Haqooq ul ibad ki Iqsam
Haqooq ul ibad ki qisam mein walidain, aulaad, miyan biwi, rishta daar, yateem, mohtaaj, parosi, miskeen, musafir, ajnabi, dost, dushman, saith, nokar, qaidi, ustaad, shagird, aur en ke ilawa deegar kayi afraad shaamil hen.
- Walidain ke sath ehsan yeh hai ke walidain ka adab kary, unki jaiz baat many, nafarmani se bachay, har waqt un ki khidmat ke liye tayyar rahay, apni taqat ke mutabiq un par kharch karne mein kami nah kary. Waghera
- Rishta daaron se husn e salook yeh hai ke rishta daaron ke sath sila rehmi kary, qata taluqi se bachay.
- Yateem ke sath husn e salook yeh hai ke unki parwarish kary, narmi se paish aaye, sar par shafqat se haath phairay.
- Miskeen se husn e salook yeh hai ke unki imdaad kary, unhen khaali haath nah loutaye.
- Paas bethnay walay jaisay rafeeq e safar, sath parhnay wala ya majlis o masjid mein barabar bethnay wala hatta keh lamha bhar ke liye bhi jo paas baithy os ke sath bhi husn e salook ka hukum hai.
- Musafir ki haajat poori ki jaye, rasta pouchy to rahnumai ki jaye aur mehman ki khush dili se khidmat ki jaye.
Esi terhan har har shakhs ke mukhtalif haqooq hain. Jo keh aik bohat tafseeli topic hai. Allah pak hamein sahih tareeky se haqooq ul ibad ada karne ki tofeeq ataa farmaye.
Hawala Jaat
