Hazrat Owais Qarni رحمۃ اللہ علیہ ke Fazail

Hazrat Owais Qarni رحمۃ اللہ علیہ aik tabi buzurag hain. En ke baray mein Hazrat syedna Abu-Hurera رضی اللہ عنہ se marwi hai. Rehmat Aalam ﷺ ne irshad farmaya : “Bay shak Allah pak apne bandon mein se un ko ziyada pasand farmata hai jo mukhlis, parhaizgaar aur gumnaam hotay hain. Jin ke chehray gard alood, bhook ki wajah se pait kamar se miley hue, aur baal bikhare hue hon.

Agar woh ameer logon kay pass jana chahain to unhen ijazat nah miley. Agar kisi mehfil mein mojood nah hon to koi un ke mutaliq sawal nah kare. Agar mojood hon to koi unhen ahmiyat nah day. Agar woh kisi se mulaqaat karen to log un ki mulaqaat se khush nah hon. Agar woh bemaar ho jayen to koi un ki ayadat nah kare, aur jab mar jayen to log un ke janaza mein shareek nah hon.”

Hazrat Owais Qarni ke fazail

Sahaba e Karaam ne arz ki : “Ya Rasool Allah ﷺ! Aisay logon se hamari mulaqaat kaisay ho sakti hai?” Aap ﷺ ne irshad farmaya : “Owais Qarni unhi logon mein se hain. “Sahaba ne arz ki : “Ya Rasool Allah ﷺ! Owais Qarni kon hai? “Aap ﷺ ne irshad farmaya : “Oska qad darmiyaana, seenah chaura, rang shadeed gandumi, daarhi seenah tak phaily hui.

Oski nigahain jhuki jhuki, apne seedhay haath ko ultay haath par rakh kar Quran pak ki Tilawat karta hai. Zaro qataar ronay wala hai. Os ke paas 2 chaadrein hain aik bichenay ke liye aur aik orhanay ke liye. Duniya walon mein gumnaam hai, lekin aasmanon mein oska khoob charcha hai. Agar woh kisi baat par Allah pak ki qisam kha le to Allah pak zaroor oski qasam ko poora karega.

Os ke seedhay kandhay ke neechay safaid nishaan hai. Kal baroz e qayamat naik logon se kaha jaye ga : “Tum log jannat mein daakhil ho jao.” lekin Owais Qarni se kaha jaye ga : “To thehr ja aur logon ki sifarish kar. “Chunancha woh qabeela Rabiya aur Muzir ke logon ki tadaad ke barabar gunahgaron ki sifarish karega.” [1] Hiliyat al Aulia, Owais bin Aamir al Qarni, al-hadith : ۱۵۶۷, ج۲, ص۹۶. ۹۷ [2]Sahih Muslim, kitaab fazail al sahaba, baab min fazail Owais al Qarni, al-hadith : ۲۲۴ ( ۲۵۴۲ ), ص۱۱۲۳

10 Saal ki Talaash

Phir Aap ﷺ ne Hazrat Umar Farooq aur Hazrat Ali ul Murtaza ko mukhatib kar ke irshad farmaya : “Jab bhi tum dono ki mulaqaat Owais Qarni se ho, to os say –apne liye dua e mughfirat karwana.” Hazrat Umar Farooq e Azam aur Hazrat Ali taqreeban 10 saal tak Hazrat Owais Qarni ko talaash karte rahay. Lekin un ke baray mein maloomat nah ho saken.

Phir jis saal Ameer ul momineen Hazrat Umar Farooq Azam رضی اللہ عنہ ka inteqaal hua. Osi saal Aap رضی اللہ عنہ ne hajj ke mauqa par Jabal “Abu Qays” par kharray ho kar logon se mukhatib hotay hue ba aawaz e buland farmaya:

”Ae Yemen se anay walay Hajio! Kya tum mein koi Owais Nami shakhs mojood hai?”

Yeh sun kar aik boorha shakhs khara hua aur arz ki: “Hum nahi jantay ke aap kis Owais ke mutaliq pooch rahay hain? Haan! Mera aik bhai hai jis ka naam Owais hai. Lekin woh to bohat ghareeb aur aam sa aadmi hai. Woh is qabil kahan ke aap os ke mutaliq sawal karen. Woh to hamara charwaha hai, aur hamaray haan oski koi qader o manzilat nahi.”

Hazrat Owais Qarni namaz ki haalat mein

Yeh sun kar Hazrat Umar bin khitaab رضی اللہ عنہ bohat ghamgeen hue goya ke Hazrat Owais Qarni ke baray mein os shakhs ka is terhan bolna aap ko sakht nagawaar guzra ho. Thori der baad aap رضی اللہ عنہ ne os boorhay shakhs se poocha : “Tera woh bhai kahan hai? Kya woh hamaray haram mein mojood hai?” Os ne jawab diya : “Ji haan! woh haram shareef hi mein mojood hai. Shayad! Ab woh maidan e Arfat ki tarf ho ga.”

Yeh sun kar Hazrat Umar Farooq e Azam aur Hazrat Ali foran maidan e Arfat ki taraf chal diye. Jab wahan puhanche to dekha keh woh Aashiq e Sadiq aik darakht ke neechay namaz parh raha hai, aur ount os ke ird gird char rahay hain. Yeh dekh kar Hazrat Umar Farooq aur Hazrat Ali apni sawariyon se neechay utar aaye aur os Aashiq e Sadiq ke paas aa kar salam kiya.

Qoum ka mazdoor aur charwaha

Hazrat Owais Qarni ne namaz ko mukhtasir kiya, aur namaz se farigh ho kar salam ka jawab diya. Hazrat Umar e Farooq aur Hazrat Ali ne pucha : “Ae shakhs! Tu kon hai?” Os ne jawab diya : “Main apni qoum ka mazdoor aur charwaha hon. Aap dono Hazraat ne farmaya : “Hum tujh se en cheezon ke mutaliq sawal nahi kar rahay balkeh yeh batayen, Aap ka naam kya hai?”

Unhon ne jawab diya : Main Abdullah (Yani Allah ka bandah) hon.” farmaya : “Yeh to hum bhi jantay hain keh zameen o aasman mein mojood tamam log Allah hi ke bande hain. Tum apna woh naam batao jo tumhari maan ne rakha hai? “Yeh sun kar Hazrat Owais Qarni ne arz ki : “Aap log mujh se kya chahtay hain?”

To unhon ne irshad farmaya : “Hamaray Piyaray Aaqa ﷺ ne hamein Owais Qarni ke mutaliq chand nishaniyan batai hain. Hum aap ki baton aur rangat ke mutaliq batayi hui nishanian to aap mein dekh chuke hain. Lekin hamaray Aaqa ﷺ ne aik nishani aur batayi thi keh os ke seedhay kandhay ke neechay aik safaid nishaan ho ga. Aap zara apna seedha kandha hamein dikha den. Agar woh nishaan mojood hua to hum pehchan jayen gey keh aap hi ke mutaliq hamaray Aaqa ﷺ ne khabar di hai.”

Hazrat Owais Qarni ka safaid nishaan

Yeh sun kar Hazrat Owais Qarni ne apne kandhay se chadar hatai to aap ke mubarak kandhay ke neechay safaid nishaan mojood tha. Nishaan dekhte hi dono sahaba ne Hazrat Owais Qarni ko bosa diya aur farmaya : “Hum gawahi dete hain keh tum hi woh Owais ho jis ke mutaliq hamein hamaray Nabi ﷺ ne khabar di thi. Allah pak aap par reham farmaiye. Aap hamaray liye maghfirat ki dua karen.”

Yeh sun kar Hazrat Owais Qarni ne arz ki : “Main nah to sirf apne liye istighfar karta hon aur nah hi kisi fard e khas ke liye. Balkeh main to har momin mard o aurat ke liye istighfar karta hon. Aap logon par Allah pak ne mera haal to munkashif farma hi diya hai. Ab Aap apne mutaliq batayen keh “Aap kon hain?”

Hazrat Ali ne yeh sun kar jawab diya : “Yeh Ameer ul momineen Hazrat Umar bin khataab رضی اللہ عنہ hain. Aur main Ali bin abu taalib hon.” Yeh suntay hi Hazrat syedna Owais Qarni baa adab kharray ho gaye aur arz ki : “Ae Ameer ul momineen! Allah pak aap ko salamat rakhay aur aap ko jaza e khair ataa farmaiye.”

Kash! Tujhe teri maan ne jana hi nah hota

Yeh sun kar Ameer ul momineen ne farmaya : “Allah pak aap par bhi reham farmaiye. Aap esi maqam par mera intzaar farmaen. Taa keh main aap ke liye mecca mukarmah se kuch cheezen khareed laun aur kuch kapray waghera le aaoun aap mujhe yahin milna. “Aap رحمۃ اللہ علیہ ne arz ki : “Huzoor! Aap takalouf nah farmaen, shayad! Aaj ke baad main aap ki ziyarat nah kar sakoon ga aur waisay bhi main kapron aur paison ka kya karoon ga?

Aap رضی اللہ عنہ dekh hi rahay hain keh mery paas oon ki 2 chaadrein mojood hain. Main inhen pharr to nahi dun ga. aur yeh dekhen mery paas chamrray ke jootay hain main itni jaldi inhen bekar thora hi karoon ga. Baqi raha paison ka masla to meri qoum waly mujhe oonton ki rakhwali aur charai ke badlay 4 dirham dete hain jo mery liye kaafi hain.

Ae Ameer ul momineen! Mery aur aap ke samnay aik tang aur dushwaar guzaar ghaati hai. Jisay sirf kamzor aur zaeef log hi uboor kar saken gey pas ho sakay to apne aap ko halka kar len. Allah pak aap par reham o karam farmaiye. “Yeh sun Hazrat e Umar ne apna durra zameen par mara aur farmaya : “Ae Umar! kash! Tujhe teri maan ne jana hi nah hota, Kash! woh banjh hoti.” Phir farmaya : “Kya koi aisa hai jo mujh se khilafat ko iski zimma dariyon aur is ke sawab ke sath qubool kar le.”

Judai ka waqt

Hazrat Owais Qarni ne arz ki : “Ae Ameer ul momineen رضی اللہ عنہ! Jo koi Allah pak se darta hai woh is [3]khilafat se dour bhagta hai. Hamari judai ka waqt aa gaya hai. Ab Aap aik taraf tashreef le jayen aur main doosri taraf chala jata hon. Chunancha Ameer ul momineen Hazrat Umar Farooq aur Hazrat e Ali رضی اللہ عنھم Mecca tul Mukarrama ki taraf tashreef le gaye

Aur Aap رحمۃ اللہ علیہ oonton ko le kar doosri taraf chal diye. Aur oonton ko qoum ke hawalay kar diya. Phir sab kaam chorr kar sirf Allah pak ki ibadat mein mashghool ho gaye. Aur bil aakhir apne khaaliq e haqeeqi se ja miley.

Agar Aapko hamarai tehreer achi lagi to esy zarur apne chahne walon k sath share karen...
Share on Facebook
Facebook
Tweet about this on Twitter
Twitter
Share on LinkedIn
Linkedin
Share on Reddit
Reddit
Share on Tumblr
Tumblr
Digg this
Digg
Buffer this page
Buffer
Share on Yummly
Yummly
Email this to someone
email

Hawala Jaat[+]

About Ahsan Iqbal

Main ek blogger hon aur es website pe content share karta hon. Meri puri koshish hoti hai keh main aapko aesa content faraham karun jo parhne aur samajhne mein aasan ho. Es k elawa wo bilkul authentic ho. Es lye aap mery har article mein references zarur dekhen gay.

Leave a Reply

Please use your real name instead of you company name or keyword spam.