Islam ek mukammal deen hai jis mein har shoba e zindagi ke liye rahnumaai mojood hai. Jihad bhi Islam ka ahem juz hai jiska talluq har Musalman se hai. Aaj hamari guftagu ka topic yehi hai. Sub se pehly hum jihad ki iqsam par baat karty hen.

Jihad ki Iqsam

Es ki kai iqsam hain jaisa keh ilm ke zariye, maal ke zariye, amal ke zariye se jihad, ya Apne nafs ke Sath jihad aur aik maidan e jung ka jihad. Hum en mein se madian e jung waly jihad ki baat karen gay.

Yeh jihad Maidan-e-jang mein kaafiron aur deen ke dushmanon ke khilaf us waqt larai karnay ka naam hai jab dushman se aap ki jaan, maal ya aap ke mulk ki sarhadain khatre mein hoon. Es ki bahut ziyad fazilat aur ahmiyat hai.

Jihad ki Ahmiyat

Eske zariye Musalman apne deen ki hifazat kar sakte hain. Apne maashray ko behtar bana sakte hain aur duniya mein adal-o-insaaf qaaim kar sakte hain. Hamare aslaaf ki seerat jihad ke waqiat se bhari pari hai, un mein se aik waqia Jang e Yarmuk ka bhi hai.

Jang e Yarmuk aur Hazrat Khalid bin Waleed رضی اللہ عنہ

Musalman shuru se hi jangju rahe hain. Iman ki taqat ne hamesha Musalmanon ko dushmanon par bartari di hai, chahe woh Uhud ka maidan ho ya phir Jang e Badr mein Musalmanon ke ek chootey se lashkar ki kaafiron ke ek barry lashkar par bartari ho.

Ek martaba Hazrat Khalid bin Waleed رضی اللہ عنہ ki qiyadat mein lari jane wali Jang-e-Yarmouk mein aap apne saathiyon ke saath jihad karne mein shamil thay. Woh dushman ki ek badi fauj se lar rahy the. Musalmanon ki tadad 40,000 jabke dushmanon ki tadad 240,000 hazaar thi.

Musalman apne josh-e-imani se bahut jam kar larre aur Allah Pak ne unki madad farmayi. Musalmanon ke is chotay se lashkar ne kaafiron ke ek bade lashkar ko ibratanak shikast di. Musalmanon ne jab bhi Islam ki sarbulandi ke liye jihad kiya, Allah Pak ne unki madad ki aur woh dushmanon par ghalib rahe hain.

Jihad ka Hukm

Ye ek aisa farz hai jiska zikr Quran aur Hadees mein mukhtalif maqamat par kiya gaya hai. Jaisa keh Quran Pak mein Allah Pak ne irshad fermaya:

Tarjuma: Aur Allah ki raah mein unse larro jo tumse larte hain aur hadd se na barho, be-shak Allah hadd se barhne walon ko pasand nahi karta. ^[1]Al-Baqara, Aayat 190

Khud hamare Nabi Kareem ﷺ ne kai ghazwat mein shirkat ki, na sirf shirkat ki balkay jihad karne ki targheeb bhi di. Ahadees Mubarak mein bhi kai maqamat par jihad ki fazilat bayan ki gayi hai, jis se eski ahmiyat ka behtareen andaza lagaya ja sakta hai. Jaisa keh:

Aik dafa Rasoolullah ﷺ se daryaft kiya gaya keh kon sa amal sab se afzal hai? Aap ne farmaya, “Allah aur uske Rasool par iman lana.” Phir kya hai? Aap ne farmaya, “Allah ki raah mein jihad karna.” Phir kya hai? Aap ne farmaya, “Hajj e mabrur.” ^[2]Bukhari: 26

Jihad karne wale ko safar ka saman, jang ka saman ya roti kapra, sawari dene wale ko bhi jihad karne ka sawab milta hai. Hadees Shareef mein bhi is cheez ki targheeb di gayi hai. Jaise keh

Rasoolullah ﷺ ne irshad farmaya: “Jisne Allah Pak ki raah mein jihad karne wale ko saaz o samaan diya toh usne bhi jihad kiya, aur jisne jihad karne wale ke ahal-o-ayal ki ache tariqe se dekh bhaal ki toh usne bhi jihad kiya.” ^[3]Riyad as-Salihin, Hadees Number: 177

Maqsad e Jihad

Jihad ka maqsad Allah Pak ki raza hasil karna aur duniya mein adl-o-insaaf ka qayam hai. Eske zariye Musalman shahadat ka rutba hasil karte hain, jiski bohat zyada fazilat bayan ki gayi hai. Shaheed zinda hota hai, Osy murda kehne se mana kiya gaya hai. Jaisa ke Quran Pak mein irshad hota hai:

“Tarjumah: Aur jo Allah ki raah mein shaheed ho jate hain, unhein murda na samjho, balkay woh apne Rab ke paas zinda hain, aur unhein achi tarah rizq diya jata hai. ^[4]Al-Imran, 169

Isliye, hamein eski ahmiyat ko samajhna chahiye aur zarurat parne par esko khushi khushi anjaam dena chahiye. Ye aik ahem farz hai. Allah pak humein amal karne ki tofeeq ata fermaye. Aamen